Aðalfundur SL

Stjórn SL boðar til aðalfundar þriðjudaginn 2. júní kl. 20 á Lindargötu 6.

Dagskrá fundarins:

1. Skýrsla stjórnar

2. Reikningar bandalagsins

3. Lagabreytingar

4. Kosning stjórnar og formanns (þegar það á við)

5. Ákvörðun félagsgjalds

6. Önnur mál

 

Í stjórn SL sitja:

Aino Freyja, formaður

Hera Ólafsdóttir, varaformaður

Eggert Kaaber, gjaldkeri

Arndís Hrönn, ritari

María Heba, meðstjórnandi.

Varastjórn

Kolbrún Anna

Margrét Rósa

 

Þrír meðlimir stjórnar gefa ekki kost á sér til áframhaldandi setu í stjórn. María Heba bíður sig fram í varastjórn ásamt Margréti Rósu.

Kolbrún Anna gefur kost á sér í stjórn.

Hér fyrir neðan eru lög SL ykkur til glöggvunar.

 

Lög Bandalags sjálfstæðra leikhúsa.

Samþykkt á aðalfundi bandalagsins þann 5. maí 2005

1. grein

Bandalagið heitir Bandalag sjálfstæðra leikhúsa (skammstafað SL) og er sameiginlegur vettvangur hópa atvinnufólks í leiklist. Tilgangur Bandalagsins er að vinna að sameiginlegum hagsmunamálum allra sjálfstæðra leikhúsa og sviðslistamanna á Íslandi. Heimili bandalagsins og varnarþing er í Reykjavík. 

2. grein

Aðili að SL getur hvert það leikhús eða sá leikhópur orðið, sem ætlar sér að starfa á grunni atvinnumennsku í leiklist og hægt er að kalla sjálfstætt starfandi leikhús eða hóp. 

3. grein

Hvert leikhús eða leikhópur sem er fullgildur aðili að SL, hefur atkvæðisrétt sem nemur einu atkvæði á fundum bandalagsins.

4. grein

Fullgildur aðili telst hvert það leikhús eða sá leikhópur sem greitt hefur félagsgjald SL.

5. grein

Stjórnarfundir og almennir fundir SL skulu haldnir svo oft sem þurfa þykir.

6. grein

Stjórn bandalagsins skal kosin á aðalfundi til tveggja ára í senn. Skal hún skipuð fimm einstaklingum ásamt tveim til vara. Formaður skal kosinn sérstaklega, að öðru leyti skiptir stjórnin með sér verkum. Á hverjum aðalfundi skulu ávallt 1-3 stjórnarmeðlimir ganga úr stjórn og nýjir kjörnir í þeirra stað. Engir tveir stjórnarmenn mega koma frá sama leikhúsinu/leikhópnum. 

7. grein

Aðalfund skal halda á tímabilinu mars - maí ár hvert. Dagskrá hans skal vera:

1. Skýrsla stjórnar

2. Reikningar bandalagsins

3. Lagabreytingar

4. Kosning stjórnar og formanns (þegar það á við)

5. Ákvörðun félagsgjalds

6. Önnur mál

Að öðru leyti verða aðalfundir vettvangur alls þess sem viðkemur hagsmunum, hugmyndum og hugsjónum sjálfstæðu leikhúsanna. 

8. grein

Fundarboð fyrir almenna fundi bandalagsins skal sent út með minnst einnar viku fyrirvara.

9. grein

Tillögur um lagabreytingar skulu fylgja aðalfundarboði og skulu berast stjórn a.m.k. tveimur vikum fyrir aðalfund.

10. grein

Aðeins er hægt að breyta lögum þessum á aðalfundi og þarf til þess 2/3 hluta greiddra atkvæða.

11. grein

Í öðrum málum þar sem atkvæðagreiðsla er notuð til ákvörðunar á fundum og þingum SL, nægir einfaldur meirihluti, nema annað í lögum þessum sé tekið fram.

12. grein

Ákvörðun um að leggja niður Bandalag sjálfstæðra leikhúsa er ekki hægt að taka nema minnst 2/3 hlutar fulltrúa SL-leikhúsanna séu á fundi og 2/3 hlutar fundarmanna greiði tillögu þess efnis atkvæði sitt. Slíka tillögu er aðeins hægt að flytja á aðalfundi. Í slíku tilviki skal menntamálaráðuneytið taka eigur og sjóði SL í sína vörslu og ávaxta, og afhenda sambærilegum samtökum ef stofnuð verða, til eignar og ráðstöfunar

Fyrir hönd stjórnar SL

Aino Freyja

Draumar 2009

Draumar 2009 er alþjóðleg döff leiklistarhátíð á Íslandi, sem haldin verður vikuna 24. til 31. maí 2009. Hátíðin er skipulögð af Draumasmiðjunni í samstarfi við Þjóðleikhúsið og Íslensku- og menningardeild Háskóla Íslands. Aðalstyrktaraðilar hátíðarinnar eru Norden kulturfond, fjárlaganefnd Alþingis og Reykjavíkurborg.
Leiklistarhátíðin Draumar er nú haldin í annað sinn en hátíðin voru fyrst haldin árið 2006 á Akureyri í tengslum við Norrænni menningarhátíð heyrnarlausra. Aðalmarkmið döff leiklistarhátíðarinnar er að bjóða heyrnarlausum Íslendingum upp á úrval alþjóðlegra leiksýninga sem gerðar eru með þarfir þeirra í huga og skara fram úr hvað gæði og fagmennsku varðar.
Einnig er markmiðið að auka tengsl listafólks sem vinnur við döff leikhús og kynna sérstaklega Draumasmiðjuna, eina döff leikhúsið á Íslandi, á alþjóðlegum vettvangi. Auk þess standa vonir til þess að hátíðin auki áhuga og skilning almennings á menningu heyrnarlausra og þá sérstaklega á döff leikhúsi.

Dagskrá hátíðarinnar er sem hér segir:

Sunnudagur 24.05.09

16:00	Opnunarhátíð DRAUMA 2009, í Þjóðminjasafni Íslands.
18:00	Fyrirlestur: Monique Holt  ræðir um notkun táknmáls á sviði. Fyrirlesturinn fer fram í Háskóla Íslands, stofu 101 í Odda – Flutt á bandarísku táknmáli og þýtt á ísenskt táknmál og raddaða ensku. Aðgangur ókeypis og opinn öllum.
20:00	Fyrirlestur: Marianne Aaro ræðir um notkun táknmáls í óperuflutning, í Háskóla Íslands, stofu 101 í Odda – Flutt á finnsku táknmáli og þýtt yfir á íslenskt táknmál, raddaða ensku og bandarískt táknmál. Aðgangur ókeypis og opinn öllum

Mánudagur 25.05.09

10:00 - 16:00	Námskeið: Lars Henning leiðir leiklistarnámskeið í líkamstjáningu í Kúlunni í Þjóðleikhúsinu – skráning er hjá Draumasmiðjunni en kennt er á ensku og þýtt yfir á íslenskt táknmál og bandarískt táknmál
20:00	Leiksýning: Fyrsta táknmálsópera heims, The Hunt of King Charles (Teatteri Totti, Finnland) í Kassanum, Þjóðleikhúsinu – miðasala á midi.is.

Þriðjudagur 26.05.09

10:00 - 16:00	Námskeið: Lars Henning leiðir námskeið á í Kúlunni í Þjóðleikhúsinu
20:00	Leiksýning: Nýtt íslenskt gamanverk á dramatískum nótum, Lostin (Draumasmiðjan, Ísland/Tékkland) í Kassanum, Þjóðleikhúsinu – miðasala á midi.is

Miðvikudagur 27.05.09

Skoðunarferð leikhópanna um Suðurlands undirlendið

Fimmtudagur 28.05.09

10:00 - 16:00	Námskeið: Lars Otterstedt heldur leiklistarnámskeið í túlkun leiktexta Lars Norens,í Kúlunni í Þjóðleikhúsinu. Kennt er á táknmáli eingöngu – skráning hjá Draumasmiðjunni
20:00	Leiksýning: Gamanverkið Mistero Buffo (Ramesh Meyyappan, England/Singapore) íKassanum, Þjóðleikhúsinu – miðasala á midi.is

Föstudagur 29.05.09

10:00 - 16:00	Námskeið: Lars Otterstedt heldur námskeið í Kúlunni í Þjóðleikhúsinu
20:00	Leiksýning: Lostin (Draumasmiðjan, Ísland/Tékkland) í Kassanum, Þjóðleikhúsinu – miðasala á midi.is

Laugardagur 30.05.09

20:00

Leiksýning: Frá Gay Pride til Drauma, The Dream boys (Tyst teater, Svíþjóð) í Kassanum, Þjóðleikhúsinu

Sunnudagur 31.05.09

14:00

Hátíðinni DRAUMUM 2009 slitið.

Menningarstefna listamanna

 Málþing í Þjóðminjasafninu, laugardaginn 16. maí kl 10-12 f.h. ,,Mótuð verði menningarstefna til framtíðar í samráði við listamenn og aðra þá sem starfa að menningarmálum.” Þetta má lesa í samstarfsyfirlýsingu ríkisstjórnarinnar – og kemur stjórn BÍL ekki á óvart, því að á samráðsfundi með Katrínu Jakobsdóttur, menntamálaráðherra, 30. mars sl. mæltist hún til þess að listamenn hæfu sjálfir mótun menningarstefnu.  Fyrstu skrefin verða stigin á þessu málþingi.  Frummælendur verða:            Halldóra Vífilsdóttir, arkitekt            Njörður Sigurjónsson, lektor Að loknum framsöguerindum verða almennar umræður.  Allir félagsmenn í aðildarfélögum BÍL eru hvattir til að koma og veita þessu mikilvæga máli lið.

Menningarlandið 2009

Menntamálaráðuneyti, iðnaðarráðuneyti og Samband íslenskra sveitarfélaga, í samstarfi við menningarráð landsbyggðarinnar boðar til ráðstefnu á Hótel Stykkishólmi dagana 11. og 12. maí n.k.

Fjallað verður um reynsluna af menningarsamningunum og spurt hver árangur hafi orðið og hvert beri að stefna.  Hvernig getum við nýtt okkur menningu og menningartengda ferðaþjónustu til nýrrar sóknar í nýsköpun og nýtingu menningararfs okkar?  

Menningarráð landsbyggðarinnar  kynna starfsemi sína og bjóða upp á fjölbreytt sýnishorn skapandi menningar. Fróðleg erindi og spennandi viðburðir.

Frá árinu 2001 hafa menntamálaráðuneyti og samgönguráðuneyti, síðar iðnaðarráðuneyti, gert menningarsamninga við sjö samtök sveitarfélaga á Íslandi. Landið allt, utan höfuðborgarsvæðisins, er tengt saman með menningarsamningum um markvissan stuðning ríkissjóðs við menningarstarf og menningartengda ferðaþjónustu gegn mótframlagi sveitarfélaga og einkaaðila í héraði.
Í íslensku samfélagi hafa að undanförnu átt sér stað miklar breytingar. Það kallar á viðbrögð – ekki síst á sviði menningar – og því tímabært að meta reynsluna af menningarsamningunum og huga að nýrri sókn í nýsköpun og nýtingu menningararfs okkar.
Af því tilefni boða menntamálaráðuneyti, iðnaðarráðuneyti og Samband íslenskra sveitarfélaga, í samstarfi við menningarráð landsbyggðarinnar til ráðstefnu á Hótel Stykkishólmi dagana 11. og 12. maí n.k.
 
Á Markaðstorgi menningarinnar munu menningarráðin á landsbyggðinni kynna starfsemi sína og bjóða upp á nokkur atriði sem henni tengjast.
 
Fjallað um reynsluna af menningarsamningunum og spurt hver árangur hafi orðið og hvert beri að stefna?   Signý Ormarsdóttir menningarfulltrúi á Austurlandi og Dr. Guðrún Helgadóttir prófessor við Ferðamáladeild Háskólans á Hólum í Hjaltadal verða frummælendur og þátttakendur í pallborðsumræðum ásamt fulltrúum frá iðnaðar- og menntamálaráðuneyti.  
 
Meðal margra góðra gesta sem flytja erindi á ráðstefnunni má nefna Jón Jónsson þjóðfræðing og ferðaþjónustubónda, á Kirkjubóli á Ströndum, Dögg Mósesdóttur kvikmyndagerðarkonu, Viðar Hreinsson bókmenntafræðing, Hjálmar Sveinsson heimspeking og þáttargerðarmann á Rás 1, Sigríði Sigurjónsdóttur prófessor við hönnunar- og arkitektúrdeild Listaháskóli Íslands, Þór Sigfússon hagfræðing og forstjóra, Elísabetu Indru Ragnarsdóttur þáttargerðarmann á Rás 1, Svanhildi Konráðsdóttur, formann Ferðamálaráðs og sviðsstjóra menningar- og ferðamálasviðs Reykjavíkurborgar, Sólveigu Ólafsdóttur sagnfræðing og verkefnastjóra hjá ReykjavíkurAkademíunni og Brynhildi Guðjónsdóttur leikkonu og leikskáld.
 
Allir þeir sem á einn eða annan hátt tengjast menningarstarfi og ferðamálum á Íslandi eru hvattir til að mæta á ráðstefnuna enda verða þær umræður sem þar fara fram grundvöllur að frekara samstarfi ríkis og sveitarfélaga um menningu og menningartengda ferðaþjónustu.
Ráðstefnan verður sett klukkan 11,00 mánudaginn 11. og henni slitið klukkan 17,00 þriðjudaginn 12. maí.  Dagskráin verður kynnt nánar síðar.
 
Ráðstefnugjald er 9000 kr. Innifalið er hádegisverður, kvöldverður (án drykkja), kaffiveitingar og kynnisferð.
 
Þátttakendur greiða sjálfir fyrir gistingu. Hótel Stykkishólmur býður upp á sérstakt  tilboðsverð fyrir ráðstefnugesti. Gisting í eina nótt fyrir manninn kostar 5000 kr. í tveggja manna herbergi og 6000 kr. í eins manns herbergi.
Ráðstefnan verður sett klukkan 11,00 mánudaginn 11. og henni slitið klukkan 17,00 þriðjudaginn 12. maí.  
 
 
Nánari upplýsingar um dagskrá ráðstefnunnar og um skráningu er að finna á www.ferdamalastofa.is <http://www.ferdamalastofa.is> .
Vinsamlega takið þessa daga frá.

ALÞJÓÐLEGI DANSDAGURINN 29.APRÍL - HALDINN HÁTÍÐLEGUR VÍÐSVEGAR UM LAND

 

Alþjóðlegi dansdagurinn verður haldinn hátíðlegur miðvikudaginn 29. apríl n.k. Munu Listdansskólar höfuðborgarsvæðisins vera með dagskrá í Kringlunni og Ráðhúsi Reykjavíkur auk þess sem leik- og grunnskólar taka þátt í deginum í leik og starfi víðsvegar um land.

Markmið Alþjóðlega dansdagsins er að yfirstíga allar pólitískar, menningarlegar og siðfræðilegar hindranir og að færa fólk nær hvert öðru í friði og vináttu með sameiginlegu tungumáli – Dansinum.

Dagurinn er haldinn hátíðlegur um heim allan með fjölbreyttum hætti en til hans var stofnað árið 1928 af Alþjóðlegu dansnefnd  ITI/UNESCO. Dagsetningin er til minningar um fæðingardag frakkans Jean-Georges Noverre, sem fæddist árið 1727 og var mikill dansumbótasinni.

Á hverju ári er ávarp velþekktra aðila innan dansheimsins sent um heimsbyggðina. Eftirfarandi eru skilaboð dansdagsins í ár eru samin af Akram Khan. Boðskapur Alþjóða dansdagsins 2009eftir Akram Khan 

“Alþjóða dansdagurinn er engum líkur, tileinkaður eina tungumálinu sem allir í heiminum tala og skilja, tungumálinu sem býr í líkama okkar og sál, tungumáli forfeðra okkar og barna.

Þessi dagur er tileinkaður hverjum þeim guði, lærimeistara, afa eða ömmu sem hefur kennt okkur og veitt okkur innblástur.

Sérhverjum söng og hvöt og augnabliki sem hefur hreyft við okkur og innblásið.

Hann er tileinkaður ungabarninu sem vildi óska að það gæti dansað líkt og stjarnan sem blikar á himninum. Og móðurinni sem segir, “þú getur það nú þegar.”

Þessi dagur er tileinkaður líkömum af öllum trúarbrögðum, litarhætti og menningu, sem miðla hefðum fortíðar í sögum samtíðar og draumum framtíðar.

Þessi dagur er tileinkaður dansinum í öllum sínum margbreytileika og óþrjótandi möguleikum til að tjá, umbreyta, sameina og gleðja. 

Vakin er athygli á að á heimasíðu alþjóðlegu leikhúsmálastofnunarinnar  www.iti-worldwide.org má sjá birtingu ávarpsins á fjölmörgum tungumálum.   

Ein rödd skiptir máli

Málþing um Rachel Corrie og samfélagslegt hlutverk leikhússins í Borgarleikhúsinu sunnudaginn 19.apríl kl 15-17    

Dagskrá

Samtal leikhússins og áhorfenda – Magnús Geir Þórðarsson leikhússtjóri Borgarleikhússins opnar dagskrána og fjallar um hvernig leikhúsið kappkostar að eiga í virku samtali við samtíma sinn.

Ein rödd skiptir máli - foreldrar  Rachel Corrie, Craig og Cindy Corrie segja frá  persónulegri reynslu sinni af því að halda baráttu dóttur sinnar áfram,  uppsetningum á verkinu víða um heim og þeim viðbrögðum sem það hefur vakið. Þau eru nýkomin af Gaza svæðinu og sýna myndir og lýsa ástandinu eins og það blasti við þeim.

Hlé

Leitin að raunveruleikanum - Kristín Eysteinsdóttir leikstjóri og leikhúsfræðingur fjallar um  gildi heimildaleikhúss

Að brjótast inní stærsta fangelsi í heimi – Sveinn Rúnar Hauksson læknir segir frá áksorunum í hjálparstarfi

7 gyðingabörn – 10 mínútna leikrit fyrir Gaza- eftir Caryl Churchill í leikstjórn Graeme Maley. Þýðandi Jón Atli Jónasson. Leikarar: Ásta Sighvats Ólafsdóttir, Bergur Þór Ingólfsson, Harpa Arnardóttir, Ilmur Kristjánsdóttir, Jóhanna Jónas, Ólafía Hrönn Jónsdóttir, Páll Sigþór Pálsson, María Ellingsen, Sólveig Arnarsdóttir, Sólveig Guðmundsdótir, 

Fundarstjóri  María Ellingsen leikari og leikstjóri

Aðgangur ókeypis meðan húsrúm leyfir

Leikritið “Ég heiti Rachel Corrie” sem var frumsýnt í Borgarleikhúsinu þann 19. mars síðastliðinn hefur vakið athygli á einu stærsta pólitíska málefni samtímans – deilu Ísraels og Palestínu. Verkið hefur hlotið lof gagnrýnenda og feiknar góð viðbrögð áhorfenda.

Síðustu sýningar á “Ég heiti Rachel Corrie” eru kl. 22.00 laugardaginn 18. apríl og kl. 20.00 sunnudaginn 19. apríl. Foreldrar Rachel Corrie verða viðstaddar báðar sýningarnar og svara spurningum áhorfenda að leiksýningunni lokinni.

Craig og Cindy Corrie hafa haldið fyrirlestra víða um heim í þau sex ár sem liðin frá því dóttir þeirra lét lífið við sjálboðastörf í Palestínu.

Þau koma til Íslands 16.apríl og eru fús til að veita fjölmiðlum viðtöl en þau eru nýkomin frá Gaza svæðinu í Palestínu.

Þóra Karitas Árnadóttir hefur milligöngu og veitir allar upplýsingar [e-mail]  sími: 6926926

Á HVERFANDA HVELI Nr. 4 - Ábyrgð listamannsins á umrótatímum

Fullkomlega tilgangslaus umræða?&#x2028;&#x2028;&#x2028;Nú tala leikarar frá eigin brjósti!

Næstkomandi þriðjudag, 31.mars, kl.20.00 verður haldinn fjórði og síðasti fundurinn í fundarröð LSÍ (á dagskrá á þriðjudagskvöldum út mars) í Nýlistasafninu - gengið inn Grettisgötumegin.&#x2028;&#x2028;Þessum fundum er ætlað að skoða hlutverk sviðslistamannsins í umróti dagsins í dag og skapa umræður um samtímann - sem og framtíðina.Umræðukvöldið 31. mars er á vegum Félags Íslenskra leikara en Félag íslenskra listdansara auk Félags leikskálda og handritshöfunda ásamt Félagi leikstjóra á Íslandi riðu áður á vaðið við góðar undirtektir í Nýlistasafninu.Þátttakendur í dagskrá kvölsins eru:&#x2028;Björn Thors, leikari
Hlynur Páll Pálsson, leikari
Þóra Karítas Árnadóttir, leikari
Jón Atli Jónasson, leikskáld
og Ólafur Egill Egilsson leikari Kvöldinu lýkur með opnum umræðum – allir eru hvattir til að leggja orð í belg.Aðgangur er ókeypis.

Leiksýningar 2007-2008

Samanlagður fjöldi gesta á leiksýningar leikhúsa, atvinnuleikhópa og áhugaleikfélaga nam ríflega 414 þúsundum á síðasta leikári, leikárinu 2007/2008. Þetta samsvarar því að hver landsmaður hafi sótt leiksýningu 1,3 sinnum á leikárinu. Gestum fækkaði nokkuð frá fyrra leikári – leikárinu 2006/2007 – eða um tæplega 25 þúsund gesti, sem samsvarar fækkun gesta um 5,7 af hundraði. Á síðasta leikári voru settar upp á fjalirnar 231 uppfærsla. Sýningar voru 3.339 talsins.

Heildarfjöldi gesta leikhúsa, leikhópa og félaga á leikárunum 2000/2001 til 2007/2008 er sýndur á meðfylgjandi mynd. Tekið skal fram að inni í tölum um aðsókn eru gestir á sýningar í skólum og á innlendar og erlendar gestasýningar. Uppfærslur nemenda eru undanskildar. Þrátt fyrir nokkra fækkun á síðasta leikári hefur fjöldi gesta aukist undangengin ár, en gestir voru tæplega 23 þúsund fleiri á síðasta leikári en við upphaf tímabilsins. Þess má geta að fjöldi gesta á leiksýningum á síðasta leikári nam laust innan við 30 af hundraði af aðsókn að kvikmyndasýningum og gestakomum á söfn og sýningar.
 

Leikhús
Á síðasta leikári voru starfrækt sex atvinnuleikhús með aðstöðu í fimm leikhúsum. Á vegum þeirra voru 12 leiksvið sem rúmuðu 2.798 gesti í sæti. Leikhúsin settu 78 uppfærslur á svið hér innanlands, þar af voru leikrit flest, 46 talsins. Samanlagður fjöldi sýninga var 1.205. Uppfærslur með verkum eftir íslenska höfunda voru 33, en eftir erlenda 38. Uppfærslur verka eftir innlenda og erlenda höfunda voru sjö. Leikhúsgestir voru samtals 275.207, að meðtöldum samstarfsverkefnum og gestasýningum. Sýningargestum leikhúsanna fjölgaði um ríflega 16 þúsund frá fyrra leikári.

Atvinnuleikhópar
Atvinnuleikhópum hefur fjölgað talsvert undanfarin ár. Leikhópar sem settu upp eina eða fleiri leiksýningar á síðasta ári voru 39 talsins samanborið við 22 leikárið 2000/2001. Á síðasta leikári settu hóparnir á svið innanlands 84 uppfærslur. Leikrit og verk eftir innlenda höfunda eru uppistaðan í uppfærslum atvinnuleikhópa. Sýningar atvinnuleikhópa innanlands voru 1.925 að meðtöldum sýningum í samstarfi við leikhús og sýningum í skólum. Heildaraðsókn að þessum sýningum var 178.125. Sýningargestum fækkaði um 34 þúsund frá leikárinu 2006/2007.

Áhugaleikfélög
Á næstliðnu leikári færðu 35 áhugaleikfélög upp á fjalirnar 81 leiksýningu víðs vegar um landið. Þrjár af hverjum fjórum uppfærslum voru leikverk eftir innlenda höfunda. Fjölmargir einstaklingar koma að uppfærslum áhugaleikfélaga á ári hverju. Samanlagður fjöldi flytjenda á síðasta leikári var hátt í 1.600 manns. Félögin sýndu 457 sinnum fyrir um 30 þúsund gesti.

Árleg gagnasöfnun Hagstofunnar um leiksýningar tekur til leikhúsa, atvinnuleikhópa og áhugaleikfélaga. Tölur eru fengnar með góðfúslegu samþykki frá viðkomandi leikhúsum og leikhópum.

Talnaefni

 

Heimild: http://www.hagstofa.is/Pages/95?NewsID=4025

Ávarp í tilefni að Alþjóða leiklistardegi 27. mars 2009 eftir Sigrúnu Eddu Björnsdóttur.

   Ágætu leikhúsunnendur.   Hvers vegna viljum við hafa leikhús? Þetta furðulega fyrirbæri sem þó hefur fylgt manninum frá ómunatíð. Í dag, þann 27. mars er Alþjóða leiklistardagurinn. Hann er haldinn hátíðlegur um heim allan í þeim tilgangi að vekja athygli á leiklistinni og mikilvægi hennar í mannlegu samfélagi. Því er vert að staldra við og velta ofangreindri spurningu fyrir sér.   Það fallegasta sem sagt hefur verið um leiklistina og hægt er að taka undir af heilum hug er að löngun mannsins til að leika, sé sprottin af þörf hans til tengjast því sem býr innra með öllum mönnum, þessu innra ljósi sem við búum öll yfir og finnum svo sterkt fyrir. Það er vegna þessarar tengingar, þessarar samkenndar sem við getum skapað nýjan veruleika. Veruleika leikhússins. Fátt er eins dýrmætt fyrir leikara og að finna þessa tengingu og taka þátt í leiksýningu sem á erindi við áhorfandann og hreyfir við honum, hvort sem er í gleði eða sorg. Við mannfólkið erum þelið sem draumar spinnast úr, þessir dýrmætu draumar sem eru eins og gullþráður í því margbrotna mynstri sem tilvist okkar mótast af. Þessi þráður kemur fram í skáldskapnum, myndmálinu, tónlistinni og hreyfingunni. Ekkert er leiklistinni óviðkomandi. Hún á að endurspegla tilvist okkar, sameina upplifun okkar og stuðla að samkennd og skilningi meðal manna.  Í viðleitni sinni til að tjá og spegla veruleikann leitar leiklistin að mismunandi formum. Þess vegna er engin ein tegund leiklistar mikilvægari en önnur.            Til er gamanleikur, harmleikur, grímuleikur, látbragðsleikur, brúðuleikur, einleikur, trúðleikur. Götuleikhús, kaffileikhús, pólitískt leikhús, stofuleikhús, barnaleikhús, vasaleikhús, útileikhús, skuggaleikhús, lítið leikhús, stórt leikhús, útvarpsleikhús, meira að segja ósýnilegt leikhús. Og áhorfendur hafa dregist að leikhúsinu í gegnum aldirnar, alveg eins og þið gerið hér í kvöld. Hvers vegna? Jú, við viljum verða fyrir áhrifum. Við viljum hlæja saman, gráta saman, láta hreyfa við hugsunum okkar og hugmyndum. Og í síbreytilegum heimi þar sem hugmyndafræði og áherslur geta kollsteypst á einni nóttu, eins og við þekkjum svo vel einmitt nú, á leikhúsið brýnt erindi. Það er ekki síst á þannig tímum sem við höfum þörf fyrir leikhús og því ber leikhúsið mikla ábyrgð. Leiklist breytir kannski ekki heiminum en við getum öll verið sammála um að í leikhúsi búi leyndur sannleikur sem hjálpar okkur í þeirri viðleitni að skilja líf okkar og viljann til að búa til betri heim.

Á HVERFANDA HVELI Nr. 3- Ábyrgð listamannsins á umrótatímum

Nú hafa danslistamenn orðið!

 Næstkomandi þriðjudag, 24.mars, kl.20.00 verður haldinn þriðji fundurinn í fundarröð LSÍ (á dagskrá á þriðjudagskvöldum út mars) í Nýlistasafninu - gengið inn Grettisgötumegin.

Þessum fundum er ætlað að skoða hlutverk sviðslistamannsins í umróti dagsins í dag og skapa umræður um samtímann - sem og framtíðina. Umræðukvöldið 24. mars er á vegum Félags Íslenskra listdansara en Félags leikskálda og handritshöfunda auk Félags leikstjóra á Íslandi riðu áður á vaðið við góðar undirtektir í Nýlistasafninu. Þátttakendur í dagskrá kvölsins spanna fjórar kynslóðir danslistamanna. þeir eru:

Ingibjörg Björnsdóttir, 
Lára Stefánsdóttir, 
Helena Jónsdóttir 
og Katrín Gunnarsdóttir. 

Umsjónarmaður fundarins er Karen María Jónsdóttir.  Kvöldinu lýkur með opnum umræðum – allir eru hvattir til að leggja orð í belg. Aðgangur er ókeypis. Sjáumst og heyrumst!